صناعة

تجارة

إظهار إعلانات

لكل من طلب الاسمنت و عرض الاسمنت تفضلوو

نشر منذ 11 سنين بواسطة مؤسسة نواف

بسم الله الرحمن الرحيم

السلام عليكم و رحمة الله و بركاته

بعد التحية و السلام
اتقدم بخالص الشكر لكل من ساهم على انجاح هذا الصرح الشامخ و الجميل
منتدانا الغالي

أكافي الصناعي

فهم اجتهدو او تعبوا لـ يصل لما وصل له من تميز وتألق
فـ لكم خالص تقديري

و اتقدم بخالص الشكر لمن وقف بجانبي وساندني للوقوف الوصول الى هذا الطريق
فـ جزاه الله كل الخير و العافية و اسكنه الله عالي الجنان
وسأخوض معكم في مضموون الموضوع

اخواني

رسالتي هذه لـ

_ وسطاء الاسمنت _

بالبداية

بسم الله الرحمن الرحيم

اتقدم لكم بالتحية على هذا المجهود الي تقدمونه لـ كسب رزقكم بالحلال الطيب
ودعواتي لكم بالرزق الحلال
واحب ان اوجه لكم نصيحتي كهديه متواضعه مغلقه بمحبتي لكم
اخواني
في الفترة السابقة انتشر موضوع الاسمنت و الطلب الشديد عليه
و هذا و لله الحمد و الشكر من صالحنا كـ تجار اسمنت و خير و بركة زي ما يقولون
بس المشكلة و الكارثة انو في ناس تنصب بالاسمنت وهي ما تدري انها تنصب على الناس تبون تستغربون
كيف انصب على الناس و انا ما ادري اني انصب عليهم
طيب راح اوضح لكم الفكرة بكل بساطة

اخي / اختي

انتم تدرون من تسوقون له ؟

تعرفون كم عملية نفذ ؟

تعرفون هل له اكواد بالمصانع الخاصة بالاسمنت ؟

تعرفون اذا اكوادهـ محلية او خارجية للتصدير ؟

تعرفون مكتبه او مؤسسته التجارية الخاصة بالاسمنت ؟

تعرفون له صلاحية بأصادر شهادة المنشاء ؟

اذا و الله كان الجواب ( لا )

كيف اجل تسوقون لـ شي خيالي او سراب

ما يربطكم فيه الا جوال

يعني معليش كيف تفكر بعشرة ملايين او مليون او حتى مئية الف ريال تبي تاخذها

عمولة و الكلام كله بجوال ؟

طيب تبي تقولي هو قالي و انا واثق فيه و كذا

طيب مهي مشكلة هل تتوقع انو التاجر راح يدفع لك عموله 10 مليون ريال او 5
مليون ريال

كاش علشانك سعيت بالامر له ؟

ما اعتقد ان هذا يبي يصير ابد ابد
لان التاجر ما وصل لـ هالتجارة كلها الا وهو عارف وين يحط الريال فيه
و محد يقدر ينكر هالشي ابد

حتى ولو صار ما صار يبي يدور بكل الطرق لـ البايع من وراك
اذكر قصة مرة علي

-----
يوم من الايام
جاني واحد من المقربين اتفق مع تاجر
على انه يبيع له اسمنت بكمية كبيرة المهم الرجال جاني يضحك و مبسووط ومحد قده
انه يبي يدخل تقريباٌ 5 مليون ريال يوم و ليلة كنت اقوله خذ نصيحتي و لا تسوي زي ما سويت و عشت باوهام
قال معلي منك
المهم جاب الشاري و البايع
و خلصو و كل شي
يعني بقى بس الي هو توقعي الشيكات و كل واحد ياخذ نصيبه
المهم
جاء اليوم الموعود دخل على مكتب التاجر الا هذا البايع معه
و خلصو الصفقة
هو انصدم و جلس يدعي قال له الشاري الي هو التاجر علشان ما تقول اني ظلمتك
هذي 5 الاف ريال خذها لك ان شاء الله يعوضك الله بصفقه اكبر منها ههههههه

وش رايكم بالموضوع ؟

شفتو كيف ان الشغلة مو لعب و لا جوال
ما فية احد بالعالم جمع ثروة و سهر و تعب عليها
و بالاخير يدفع مبلغ و قدرة لـ سواد عيون السمسار

لا وربي ما راح يدفعها و هذا بحكم احتكاكي بأغلب من يطلب الاسمنت من التجار و مو اي تجار الي يمكن
فوق الهوامير ما شاء الله
لانه كل شي يخطط له بالحرف ما شاء الله .

عاد اقولكم نرجع للموضوع الاساسي

اخي / اختي

تاكدو قبل السعي بأي صفقة اسمنت من خلوها من النصب من ناحية البايع و المشتري
لان اي عملية نصب انت راح تكون مشترك بالنصبة و راح تكسب اثم المظلوم منهم سواء كان الشاري او البائع

و ما اذكرك وش عقوبتها من ناحية الامور الدنيوية من سجن و و الخ
بس انا اقول ان هذا شي هين بس الي مو هين وربي
الي هو الاسهم الليلة

الي هي دعوة المظلوم هذي اقوى عقوبة راح تمر عليك و الله يبعدنا عنها و يبعد كل غالي علينا

لانك راح تتنكد بكل حياتك بسبب دعوة من مظلوم و تذكرو انها لا ترد ابد
يعني مستجابة

غير هذا و هذا
كيف راح ترضى انك تاكل بفلوس حرام او توكل فيها اهلك و تشبع بطونهم بالحرام
و العياذ بالله

هذي هي نصيحتي بخصوص التاكد من ناحية البائع للاسمنت
و راح اقولكم اخواني معلومات راح تفيد اي شخص يسعى وراء الاسمنت و البيع و الشراء

اخي / اختي

ارضى بالقليل و راح تربح الكثير

بمعنى الحين انا ما شاء الله يمرون علي اكثر من 100 شاب و شابة
يطلبون اسعاري للاسمنت و كم واصل لـ الديرة الفلانية و المنطقة الفلانية
و اقولهم بكل اريحية

و يجون لـ السوال الي يستحون يسالونه و اذا سالوه حبوك بعده
الي هو كم عمولتي بالموضوع

انا و الله ما احدد عمولة لـ احد بس انصح انه ما يطيرها سماء و ان

( الطمع فرق ما جمع )

راح اقولكم سالفة مرة علي بخصوص هالموضوع كلمني شخص الله يستر عليه
قالي كم اخوي توصلون الاسمنت لي بالمكان الفلاني
قلت و الله سعر الاسمنت كذا من المصنع و النقل كذا و العمولة كذا

قال ما قصرت و سكر السماعه بعد يومين دق نفسة و قال كم واصل لـ المنطقة الفلانية

قلت انت الي تبي تشتري كانه تردد بالجواب بعدين قال لا و الله سمسار بالموضوع قلت طيب

وش صار على الرجال الي قبل قال ما يبي بهالسعر انا استغربة انه رفض سعري مع اني اتوقع اقل مافي السوق

قلت ليه انت كم قلت له للامانه اصدقني القول ؟

كم تتوقعون صار قايل لـ التاجر الي يبي يشتري !

صراحة يوم قالي انفجرت ضحك و هو استغرب الضحك

صار الرجال رافع السعر بحكم عمولته دبل على التاجر و صاير السعر الي قايلة له اغلى من
اسعار الاسمنت الي بالمنطقه عندهم يعني التاجر يبي يخسر او يفلس اذا شرى مني ههههه

اخواني

قبل لا تعطي اي تاجر سعر بالاسمنت حاول تعرف السعر الي منطقة التاجر يباع فيها
يعني مثال

نقول سعر الكيس واصل لـ الامارات 20 ريال من عندي

( طبعاٌ هذا مثال توضيحي )

يعني انا اخذ من التاجر هالسعر طيب انت اول شي تفكر فيه الكمية كم راح يطلب التاجر ؟
اذا و الله الكمية كبيرة ارض و اقبل بأقل نسبة لانك مستفيد حتى لو بـ ربع النص يعني تقريبآ عشر هللة

يعني نقول لو التاجر طالب 100 الف كيس و انت تقول له بـ
20,25

يعني الربع هذا لـ السعي
يعني يطلع لك يالغالي 25 الف ريال من صفقة وحده
هذا وهو ربع اجل لو انه نص كم راح يكون لك اكيد رايح يكون 50 الف ريال
شفتو كيف الشغله زي الحلاوه بس المشكلة بالطمع لانه هو الي يعمي العين و القلب بس اذا فكرة بالمنطق
هالسعي مرضي بقوة مع اني اقول 100 الف كيس و للمعلومية اغلب الناس ياخذون
اكثر او بشكل مفتوح
طيب هذا بخصوص الترتيب بالسعر
طيب

النصيحة الثانية

لا تفكر يوم من الايام تقول لـ التاجر ابي نص ريال كاش

بدال ما تضرب الرجال بهالشرط قوله ابي حقي يكتب بالعقد مثال ربع ريال لـ الساعي فلان او لـ الطرف الثاني تتحول لك في كل بيعه او كل تحميل
على الحساب كذا و كذا
بكذا تضمن حقك بالعقد و يكون شغلك بالسليم مو زي واحد كنت طالب كمية

10مليون كيس

انا بسبب ضغط الطلبات علي و الكوارث الطبيعية الي صارت بالمصانع
جاني يقول نص ريال كاش
قلت له لا هذا مرفوض بقوة الكاش تبي كل يوم بيومه احاسبك ما عندي مشكلة قال
ماني فاضي انزل كل يوم للبنك اشيك او اخذ منك حق السيارات
اظن ان التاجر الي يبحث عن الرزق و الثراء
يدور وراء الريال قبل الاف
ما فية شي يجي بارد مبرد
يعني اتعب بالبداية الين تقدر تدخل السوق و تعرف اسرار و خوافي
السوق و تقدر تجيب لك موظفين و تكبر و ترقى السلم درجة درجة
زي ما يقولون اول الميل خطوه
طيب بكذا احس اني تكلمة بما يكفي بخصوص السعاة و احس اني اتعبتكم معي

اخواني و اخواتي

الوسطاء

ما اقول الا الله يفتحها بوجيهكم بكل مكان تقصدونه و يبعد
عنكم كل نصاب و نصابة

طيب

رسالتي الثانية

لـ ( المستثمرين و التجار ) بمناطق الخليج و الشرق الاوسط بشكل عام

اخواني انا لا ازكي كل بائع اسمنت سعودي
و مع الاسف و كل الاسف ان اغلب السوق الان نصب في نصب
اخواني راح اقولكم نصائح تقدرون ان شاء الله تتفادون عمليات النصب الي صايرة
على اخواننا الخليجيين و العرب بشكل عام

اخواني بالبداية

ابتعد عن من يقول لك ادفع كاش نص او ربع ريال

لان هذا بدون اي نقاش نصاب لانه راح ياخذ منك هالمبلغ و يقول مع السلامة وروح يالتاجر دورة بكل مناطق الخليج
ما راح تحصلة و راح تضرب كفوف الندامة و تعلن الخسارة

اخي التاجر

تاكد من سعر المصنع قبل طلب اي كمية تكون من اي تاجر اسمنت حتى تكون الامور واضحة معك

و تعرف اذا زائد عليك السعر او ناقص
لان البعض يقولوك عندي اسمنت بـ 10 ريال و سعر المصنع بـ 15 ريال
كيف راح تجي هذي تبي تقولي معه واسطة ما اعتقد ابد لان المصنع غني عن اي واسطة تكون

و ما راح ينقص ريال بالسعر علشان فلان و فلان
بعدين كيف راح ينقصون لك سعر الكيس و عملاء المصنع من افتتاح المصنع يسحبون يومين بكميات كبيرة و بنفس سعر المصنع و بدون نقص ريال واحد
تتوقع هالشي اذا درو عنه عملاء التميز راح يسكتون ؟

لا و الف لا

مره من المرات جاء اخ من الاخوان و قال عندي اسمنت بسعر 11 ريال من اليمامة
و سعر اليمامة بـ 13 ريال وبعد فترة اتصل علي و قال سويت عروض
بس صار الوضع فيه نصبة قلت كيف قال اتصل على مسؤل من ادارة مصنع اليمامة و سالني كيف تقدر تطلع اقل من السعر الي محددينه
و نبهني من هالنصب الي صاير بالسوق و اكد له انه من سابع المستحيلات ان سعر الكيس ينقص لفلان و فلان لا
و ان الاسعار شاملة من اول عميل لـ اخر عميل
وان بعض كبار العملاء درو عن هالعروض و تضايقو و اشتكو المصنع

شفتو اخواني كيف الوضع صاير بالسوق من لعب و كذب و نصب طبعاٌ رسالتي هذي

لـ تجار الخليج علشانهم

الله يرزقهم على نيتهم و ما يدرون وش الي صاير هنا

طيب و احب انوه بخصوص موووضووع ثاني الي هو خط الانتاج VIP انا ما ادري صراحة كيف وضع هالخط الانتاجي

لان خط الانتاج واحد بكل المصنع و لا عمري سمعت ان فيه خط انتاج VIP و سعره ثابت

لان من سابع المستحيلات انو يكتب المشتري عقد و يلزم المصنع بسعر معين و اكبر دليل
مصنع اليمامة و تذبذب سعره الاسابيع الي طافت مره 17 مره 18 مره 19 و بالاخير 17
يعني ما شاء الله كل سبت من كل اسبوع يتغير السعر و لا هو ثابت هالايام

ملخص هالموضوع اخواني او الفوائد المرجية

.. لكل وسيط ..

1- عزيزي الوسيط لا تسعى وراء بائع قبل ان تعرف كل شي عنه

2- ارض بالقليل تربح الكثير

3- لا تطلب من التاجر السعي مقدم لان في طلبك هذا قد فقدت مصداقيتك

4- لا تسعى وراء اي شخص يقول لك ربع ريال مقدم كاش

5- مراقبة اسعار الاسواق بكل مناطق الشراء كـ اسواق السعودية , الامارات , قطر , صفوان حتى تعرف كيف تحدد نسبتك او عمولتك بدون
ان ترفع السعر على التاجر

نصائحي لـ التجار بكل اقطار العالم العربي

1- قبل لا تكتب اي عقد شراء اشترط الدفع بشكل يومي او اسبوعي

2- ابتعد قدر الامكان عن ما يقول ادفع كاش نص او ربع ريال

3- تاكد اخي الكريم ان ورقة التزام الشراء غير مطلوبة بالبيع ابداٌ


4- تاكد من السجل التجاري لـ الشركة البائعه للاسمنت

5- اقراء شروط العقد قبل التوقيع و تاكد منها فـ البعض يدس السم بالعسل

6- تاكد توثيق العقد من الغرفة التجارية لـ حمايتك و حماية البائع و تاكيد لـ العقد

7- تاكد بأن البائع سوف يعطيك شهادة منشأ خاصة لك


تنبيه: للتواصل مع صاحب الاعلان عبر التلفون او الواتس آب يجب عليك التسجيل او تسجيل الدخول

قم بتسجيل الدخول لكي تتمكن من إضافة تعليق

331 متصل الأن
بإنتظار إعادة الإتصال...